Réttarhöldum yfir Jóni Ásgeiri Jóhannessyni og fleirum sem fara áttu fram í dag, þann 9. nóvember, í New York fylki, BNA, hefur verið frestað. 

Réttarhöldunum var frestað til að gefa málsaðilum tækifæri til að leggja fram frekari greinagerðir til að koma að athugasemdum um skjöl sem nýverið hafa  komið í leitirnar og hafa verið efni bréfaskipta milli málsaðila og dómstólsins undanfarnar tvær vikur.

Þá hafa varnaraðilar tekið fram að þeir muni draga til baka lögfræðiálit Brynjars Níelssonar og að þeir muni leggja fram aðra yfirlýsingu frá íslenskum sérfræðingi, og verður nafn hans kynnt síðar. Glitnir mun tilkynna um nýja dagsetningu á réttarhöldunum þegar málsaðilar og dómstóllinn hafa komið sér saman um hana.

Glitnir svaraði í gær í New York frávísunarkröfum sem Jón Ásgeir Jóhannesson og aðrir, sem stefnt var í máli bankans í New York, lögðu fram í júlí. Í svari sínu ítrekaði Glitnir þann eindregna ásetning sinn að fylgja eftir málarekstrinum í New York, enda væri hann liður í viðleitni bankans um heim allan til að endurheimta eignir í þágu kröfuhafa bankans.  Í stefnu málsins í New York er því haldið fram að stefndu hafi veitt þeim fjármunum sem um ræðir út úr bankanum áður en hann féll.

Í svörum Glitnis er m.a. að finna eiðfestar yfirlýsingar frá nokkrum fyrrum starfsmönnum bankans. Glitnir er staðráðinn í því að elta uppi höfunda þess ráðabruggs sem lýst er í stefnu málsins í New York og vill koma á framfæri þökkum fyrir stuðning Íslandsbanka og samstarfsvilja og sannsögli þeirra sem áður störfuðu hjá Glitni.

Glitnir í Lúxemborg stofnar dótturfélag til að annast umsýslu eignasafns bankans

Glitnir í Lúxemborg hefur stofnað dótturfélagið Reviva Capital til að annast umsýslu og reksturs eignasafns bankans. Reviva Capital hefur hlotið starfsleyfi frá yfirvöldum og fjármálaeftirliti Lúxemborgar til að annast innheimtu- og eignaumsýslustarfsemi og hyggst félagið jafnframt bjóða öðrum aðilum þjónustu sína. Hjá Reviva Capital starfa átján starfsmenn, þar af níu Íslendingar. Stjórnendur og lykilstarfsmenn Glitnis í Lúxemborg eiga 10% hlut í félaginu sem að öðru leyti er í eigu Glitnis í Lúxemborg. Eignarhlutur starfsmanna er skilyrtur og tengdur markmiðum félagsins til lengri tíma.

Slitastjórn Glitnis hf. fékk í dag úrskurð um alþjóðlega kyrrsetningu í sambandi við kröfur Glitnis á hendur Jóni Ásgeiri Jóhannessyni. Kyrrsetningin kemur til vegna millifærslna sem framkvæmdar voru daginn eftir að eignir Jóns Ásgeirs voru kyrrsettar í Bretlandi þann 11. maí sl.

Færð voru í heild 585.648 bresk pund til Bohemian Partners LLP, Tina Maree Kilmister,Aspiring Capital Partners LLP og Jeffrey Ross Blue. Var umrætt fé kyrrsett skv. úrskurði dómara í London í dag. Kyrrsetningarnar gilda einungis um það fé sem þessir aðilar fengu frá Jóni Ásgeiri Jóhannessyni eftir að alþjóðleg kyrrsetning var gerð á eignum hans. Ekki var krafist kyrrsetningar á öðrum eignum viðkomandi aðila.

• Málið var þingfest fyrir rétti í New York í gær, 11. maí.
• Dómstóll í Lundúnum úrskurðaði í gær um kyrrsetningu eigna Jóns Ásgeirs Jóhannessonar um víða veröld.
• Fréttamannafundur um málið verður í Reykjavík kl. 14:30 í dag, miðvikudaginn 12. maí.

Glitnir hf. hóf í gær málaferli fyrir dómstóli í New York-ríki í Bandaríkjunum gegn Jóni Ásgeiri Jóhannessyni, áður helsta hluthafa bankans; Lárusi Welding, áður forstjóra Glitnis; Þorsteini Jónssyni, áður stjórnarformanni; ásamt fleiri fyrrverandi stjórnarmönnum, hluthöfum og öðrum sem áttu hlut að máli með Jóni Ásgeiri, fyrir að hafa með sviksamlegum og ólöglegum hætti haft fé af bankanum sem nemur meira en tveimur milljörðum dala.

Glitnir höfðar jafnframt mál gegn PricewaterhouseCoopers, fyrrum endurskoðendum bankans, fyrir að greiða fyrir og taka þátt í að dylja þau sviksamlegu viðskipti sem Jón Ásgeir og félagar komu í kring og sem að endingu leiddu til falls bankans í október 2008.

Þá hefur dómstóll í London gefið út úrskurð, að kröfu Glitnis, um kyrrsetningu eigna Jóns Ásgeirs Jóhannessonar um víða veröld. Þeirra á meðal eru tvær íbúðir í auðmannahverfinu Gramercy Park á Manhattan sem hann keypti á u.þ.b. 25 milljónir dala.

Vegna fyrirspurna fjölmiðla veitir skilanefnd og slitastjórn Glitnis hér með yfirlit um heildar rekstrarkostnað á árinu 2009. Mikilvægt er að hafa í huga að kostnaður við rekstur búsins greiðist af kröfuhöfum sem eru að stærstum hluta erlendir aðilar eða um 80%. Fulltrúar kröfuhafa fylgjast náið með starfsemi Glitnis og eru þeir upplýstir ýtarlega um framvindu mála reglulega. Til að hámarka virði þeirra eigna sem eru í búi Glitnis hafa fulltrúar kröfuhafa lagt ríka áherslu á að leitað sé ráðgjafar og aðstoðar hjá færustu sérfræðingum á hverju sviði. Vegna umfangs búsins og flókinna verkefna sem við er að fást hefur eðli málsins samkvæmt reynst nauðsynlegt að leita til alþjóðlegra sérfræðinga í ríkum mæli.

Kosin hefur verið ný sjö manna stjórn í Íslandsbanka. Sex stjórnarmanna eru skipaðir af eignarhaldsfélaginu ISB Holding ehf.,  sem er í eigu Glitnis banka hf. sem fer með 95% eignarhlut í Íslandsbanka. Bankasýsla ríkisins hefur skipað einn fulltrúa í stjórn samkvæmt tillögum valnefndar.

Skilanefnd Glitnis hf., fyrir hönd kröfuhafa, ákvað þann 15. október s.l. að eignast 95% hlut í Íslandsbanka á móti 5% hlut ríkisins. Þau sem nú hafa verið kosin í stjórn bankans hafa öll mikla reynslu af viðskiptum, fjármálamarkaði og stjórnun fyrirtækja.

Eignarhald á dótturfélögum Glitnis, sem hafa með höndum fjármála- og vátryggingastarfsemi hefur verið fært undir eitt eignarhaldsfélag, GLB Holding.  Félagið er að fullu í eigu Glitnis. Þessi skipulagsbreyting er gerð meðal annars til að fullnægja skilyrðum Fjármálaeftirlitsins, sem þann 30. desember síðast liðinn veitti ISB Holding,  leyfi til að fara með 95% eignarhlut Glitnis í Íslandsbanka.  Áður hafði Samkeppniseftirlitið veitt samþykki sitt.

Fjármálaeftirlitið hefur veitt ISB Holding ehf. leyfi til að fara með virkan eignarhlut í Íslandsbanka fyrir hönd Glitnis hf. Leyfið er veitt í kjölfar samnings Glitnis og íslenska fjármálaráðuneytisins, hinn 13. september síðastiðinn, þess efnis að Glitnir gæti eignast 95% hlut í Íslandsbanka að uppfylltum ákveðnum skilyrðum.

Slitastjórn Glitnis hefur birt skrá yfir lýstar kröfur við slitameðferð Glitnis á lokuðu vefsvæði sem kröfuhafar hafa aðgang að á heimasíðu bankans. Kröfuhafar sem lýst hafa kröfum geta einnig nálgast kröfuskrána á skrifstofu Glitnis í Sóltúni 26 í Reykjavík.